欲舉家移居內地方便搵錢 羅子溢︰唔想下一代咁辛苦

羅子溢（前名羅仲謙）在台慶劇《星空下的仁醫》演濫藥兒科醫生獲好評，不過他已決意離開香港這個成長地，舉家移居內地尋找更多工作機會，希望給太太楊茜堯（前名楊怡）及囡囡「小珍珠」羅翊心美滿前景︰「身為父母，唔想下一代好似自己細個咁辛苦！」

《星》劇將在下周一大結局，子溢飾演濫藥醫生，演出有突破。他與馬國明、周家怡等也是《On Call 36小時》的老拍檔，但太太楊茜堯（前名楊怡）卻無緣再聚，子溢亦覺遺憾。「如果太太一齊拍就不得了，但要放低個女又唔捨得，佢以個女行先，所以時間上唔許可。」提到在頒獎禮爭獎，他坦言未有寄望，寧要獎金不要獎品。「我明白上台攞獎好開心，但做咗人爸爸之後覺得工作多最重要，寧願拍多幾齣劇賺奶粉錢。」

IG只追蹤太太當示愛

去年尾，子溢與楊茜堯曾返內地拍攝網劇《家族榮耀》，不過二人並非演情侶，「如果我哋做情侶，觀眾可能覺得造作，劇中大家各自有另一半，相信我哋嘅對手李彩華、黃浩然會尷尬啲。」子溢與楊茜堯一向恩愛，子溢的IG帳戶只追蹤太太一人，絕對是暖男典範。「當時開IG已經打算咁，其實無問過老婆，當做係示愛啦。」他不打算追蹤其他藝人朋友︰「其實無乜特別，我都無問太太點諗，習慣咗，所以無得返轉頭。」

現年37歲的子溢正值壯年，他直認希望繼續「造人」︰「我哋不嬲順其自然，不過出年我會返內地開工，日後可能全家搬去上海、北京呢啲大城市居住，囡囡都會喺落腳嘅城市讀書。」子溢坦言，為了賺錢養家才決定離港。「始終內地娛樂圈多機會，身為演員希望有更大嘅平台發展；同埋做父母嘅都唔想下一代好似自己細個時咁辛苦。其實去邊個城市都OK，如果疫情好轉唔使隔離，邊度返香港都一樣方便。」子溢與太太已有共識，待工作穩定後便會安排妻女返內地定居。由影圈大隻小鮮肉變成暖男爸爸，子溢為湊女花不少心神，但仍樂做「女兒奴」。「我初時唔畀囡囡玩手機，但上年疫情嚴重無得出街，留喺屋企時間太多，之後我都投降畀佢睇片。」

場地︰W Hotel

服裝︰Sandro Paris

化粧︰Jennifer@Annie G Chan

髮型︰Jan Chiu@IL Colpo

造型︰Cheryl Yam

撰文︰Steven

美術︰顏玉玲

攝影︰Alma