大搞《演鬥聽》告別作 王梓軒重提「神算歌手」唔尷尬

無綫音樂節目《演鬥聽》開播以來，邀請不同歌手「比拼」，即興創作新音樂，另類風格累積不俗口碑。節目將於明天播出最終章《演鬥聽王者之戰》，擔任主持及音樂總監的王梓軒預告會「大搞」，並感激公司與一眾歌手的無限信任。

《演鬥聽》有別於一般的音樂節目，歌手們會即興創作，猶如開音樂party，王梓軒說︰「對於台前幕後都係一個新嘗試，包括我自己。一開始大家都唔知點玩，我同歌手朋友或者佢哋公司傾，大家都好多疑問，最後真係靠班朋友信我，例如Eric（郭偉亮）、Hanjin（陳奐仁），喺唔知玩咩嘅情況下就話一齊玩，好感動。」

節目贏了口碑，但被安排於深夜時段播放，收視未見突出。不過王梓軒未感失望，「其實有意外收穫，因為好多年輕人夜晚先活躍，多咗佢哋嘅關注同支持。」節目最後一集特別提早在晚上十時播出，王梓軒感激公司的信任︰「我哋會加把勁，因為有啲收視壓力，但呢個都係一個好好嘅機會，畀我哋進步。」

鋪路做全方位製作人

說到創新與突破，不少歌手都於節目內《我點你作》環節中大爆秘密，如鄭俊弘重提當年「火車未到站」、胡鴻鈞自嘲「刀削面」等。至於曾因計錯數而被嘲「神算軒」的王梓軒笑言︰「節目組已經抽咗我水，有個環節叫《我是神算歌手》，要一路唱一路數秒數，但算係畀咗個機會我平反，原來我心算都唔算差，反而導演組不停計錯。」

王梓軒不介意被抽水，反而視主持《演鬥聽》為一個學習機會，為他將來擔任製作人做好準備。王梓軒又希望與更多朋友合作寫歌，「趁依家有咁多ideas，成個音樂團隊咁熱切，應該會搵埋幾個朋友仔出（新歌），希望大家拭目以待。」

撰文︰Crystal

美術︰梁政敏