與老公分隔兩地 周勵淇預告將全面復工

周勵淇（Niki）三年前與內地演員傅浤鳴結婚，並於去年誕下囝囝Morris後，一直深居簡出。不過身形fit爆的Niki前晚出席電影首映禮時，預告將全面復工，留港拍攝新電影。

電影《長津湖》前晚舉行香港首映禮，周勵淇、衛詩雅及泳兒等現身出席。Niki去年誕下兒子Morris後專心湊仔，但她表示將全面復工，留港拍攝新電影，「如果離開香港就會唔捨得，但新戲喺香港拍都OK，收工就可以見到BB。」Niki又指老公傅浤鳴目前已離港工作，但疫情下要分隔兩地也沒有辦法。

衛詩雅日食一餐減15磅

而衛詩雅表示早前為拍新戲而減肥，近日上磅比兩年前輕了15磅，她說︰「每日淨係食晚餐，再配合運動，晏晝就不停飲燕麥咖啡。其實呢個方法未必人人都受到，要因應唔同體質去調節。」問她會否繼續減肥？衛詩雅透露將開拍新戲，需要有點「肉地」，但自覺花了很多時間減磅，不想一下子反彈，心情十分矛盾。

另外，電影在內地成績理想，導演林超賢直言開心但意外，但他透露原班人馬已拍攝另一個故事，希望在農曆新年檔期上映。提到拍攝時的辛酸，林超賢說︰「拍攝期間我真係以為自己要捐軀，喺零下30度嘅山上，連續拍咗60晚通宵，試過拍到成個人暈低，撞爆咗額頭。」

採訪︰Pauline

美術︰梁政敏

攝影︰林良明