過氣情侶合作 蔣家旻朱敏瀚拍親熱戲唔尷尬

譚俊彥、蔣家旻及朱敏瀚昨日宣傳劇集《換命真相》，現實中蔣家旻與朱敏瀚曾經拍拖，二人在劇中有親熱戲，但他們不覺尷尬，拍攝時更會互相提點，反而譚俊彥完全不知他們是舊情人。蔣家旻指劇中有多場喊戲，幸有舊愛朱敏瀚教路，「佢會用觀眾角度諗，如果場場喊戲都出盡力，觀眾會覺得好煩，反而有啲位眼濕濕仲好。」提到二人再見亦是朋友，蔣家旻表示拍攝時有默契，不用太避忌，不過他們私下已極少聯絡。

而朱敏瀚則表示與蔣家旻曾拍拖近兩年，大讚女方是好演員；提到今次合作拍親熱戲，他指現任女友余思霆知情，亦不會呷醋。他說︰「女朋友最近返咗香港，依家隔離緊，到時隔離完一定會去接佢。我哋超過一年無見啦，因為佢之後都要返台灣，所以特別珍惜拍拖相處嘅時間。」

採訪︰Pauline

攝影︰林良明