《星空下的仁醫》與BB互動父愛大爆發 羅子溢靠囡囡入戲︰同小演員多玩多交流

育有一歲半愛女「小珍珠」羅翊心的羅子溢（前名羅仲謙），有份演出無綫台慶劇《星空下的仁醫》，本周劇情交代他飾演的小兒外科醫生Max，仆心仆命拯救半歲BB病人思瀚，雙方在病房的交流互動充滿愛，感動不少網民。昨日子溢接受《晴報》訪問時，透露拍攝前做足準備︰「最重要令BB唔好驚，就易啲被我帶入戲。」

《星空下的仁醫》播出至今話題不絕，鄭嘉穎、馬國明及鍾嘉欣等演活貼地仁醫，劇情有笑有淚，在網上掀起熱潮。近日劇情亮點落在羅子溢瞓身救回因手術出問題而瘋狂嘔吐的半歲BB思瀚。劇中的小思瀚向子溢流露無助的眼神，而子溢心痛地回望BB，觀眾激讚二人互動令人睇到眼濕濕。對於與BB小演員合作，昨日子溢坦言︰「其實呢位初生BB係我哋其中一位工作人員嘅小朋友嚟，本身呢位BB比較細個，同埋喺陌生地方，拍攝前都要等BB warm up，所以等候會長少少。」

憂小演員貼喉管不適

劇中的子溢慈父上身，他指因劇情需要，BB身上貼了不少喉管，他也擔心BB不適：「大家盡量協調，希望盡快完成拍攝，所以當BB一ready，遠鏡拍咗兩、三個take就已經拍完，然後分part再補一啲近鏡、唔同角度。」提到與BB拍攝時，可有將對愛女「小珍珠」的父愛投射到小演員身上？他笑說：「無錯呀！因為拍攝嗰陣囡囡啱啱出世無幾耐，所以見到呢啲小朋友真係好有代入感，知道同小朋友拍攝，要點樣去令到佢哋更專注。」

收視一般冀口碑延續

子溢強調︰「最重要是令小演員唔好驚，所以真係要同佢哋玩，同佢哋交流，大家之間有互動，有默契，佢哋就會容易啲被我帶入戲。」對於劇集口碑不俗，但上周收視僅錄得18.9點，他回應︰「都有少少失望嘅，其實知道口碑好好都好開心，相信之後嘅收視會愈嚟愈好！」另外，監製方浤酌接受訪問時，亦坦言該幕戲拍得甚艱苦︰「呢場戲能夠順利完成，要多謝好多人嘅努力，拍攝團隊為咗捕捉BB嘅眼神，一等就等幾個鐘。」監製指全靠子溢及BB父母，才成功捕捉BB的眼神，「佢哋喺鏡頭後不斷拎BB鍾意嘅玩具引佢，同埋子溢喺鏡頭內外，都有不斷抱BB，用好多時間、心機交流，等BB穩定啲。」

撰文︰Steven

美術︰梁政敏