出爐港姐三甲盼圓拍劇夢 宋宛穎靠伯樂薛家燕增強自信

《2021香港小姐競選》由選美世家出身、22歲的中葡混血兒宋宛穎（Sabrina）勇奪冠軍，亞軍為擁有碩士學歷的梁凱晴（Carina），中越混血兒邵初（Kristy）則同時獲季軍及友誼小姐。三位美女對未來各有憧憬，曾於2010年《歡樂滿東華》為薛家燕伴舞的Sabrina，最希望以港姐冠軍的身份，再次與恩師家燕姐合作，「家燕姐當時畀機會我上台表演，令我選港姐更大膽同自信，所以要請佢食飯。」果然明白飲水思源的道理。

宋宛穎的母親是90年澳門小姐亞軍文寶雪，而冠軍文雪兒則是她的表姨媽；文寶雪亦曾於91年參選華姐，並與袁詠儀是同屆佳麗，難怪Sabrina被指出身於選美世家。不過，年僅22歲的Sabrina對此卻未敢認同，「無講到咁大，我之前參選都係靠自己，台上答問題都無人幫，不過媽咪有教我飲食同keep fit，婆婆亦估唔到我贏到冠軍。」提及年幼時在家燕媽媽藝術中心學藝，11年前更曾為家燕姐伴舞，Sabrina回想亦感幸運︰「當時我11歲，好想上電視表演，當時嘅經驗令我學習到上台要有膽量同自信，希望再有機會同家燕姐合作。我記得當時上咗堂半年，又拍過《弟子規》MV，可惜之後要準備去外國讀書，就無再上堂。」Sabrina已十年沒有跟家燕姐見面︰「見到佢我一定要請佢食飯。」希望盡快一嘗拍劇滋味的她，已獲安排在本月台慶夜任司儀，可見備受重用。

梁凱晴望成「陳法拉2.0」

至於亞軍梁凱晴，畢業於英國名牌大學，更獲讚與90年代「宅男女神」楊采妮撞樣，絕對是美貌與智慧並重。Carina笑言跟女神撞樣，有助她在觀眾中留下更深印象。「自覺眼同眉都似，其實都好，多啲人記得我。」不過，原來Carina的偶像是陳法拉，「我係Marvel超級英雄電影嘅粉絲，睇咗梁朝偉及陳法拉嘅《尚氣與十環幫傳奇》，希望未來都好似法拉咁，拍劇後再拍電影。」Carina相信自己的真誠能夠打動觀眾，亦希望拍古裝劇。「我細個鍾意睇宮鬥劇《金枝慾孽》，覺得黎姿好靚，如果可以拍古裝劇，就算撞正炎夏都無問題。」

邵初樂做凍齡美女

至於現年27歲的季軍邵初，在三甲中最年長，她待人接物亦較得體︰「自覺優點係識搞氣氛又識照顧人，其實今年有好多已經27歲嘅佳麗，自己入圍前一個月先27歲，有觀眾喜歡成熟女性，可能遲啲大家會覺得我係凍齡美女！」曾經從事銀行業的Kristy，借助選美體驗不一樣的人生︰「幾年前仲係OL，無諗過可以贏到港姐，所以大家趁後生，乜嘢都要試下。」Kristy曾學唱歌，至於演戲方面，她自誇無論演好人、惡人也應付自如︰「我好鍾意搞笑，如果發展好似王祖藍咁都幾好，不過我最鍾意嘅偶像係梅艷芳，佢嘅爽朗性格同正義感都好吸引我，希望將來有機會拍劇，可以扮演女英雄。」

撰文︰Steven

美術︰梁政敏

攝影︰林良明