新都城中心辦「體育學院」 專業教練指導體驗設備

港隊健兒喺今屆奧運會同全運會獲得佳績，令好多香港人留下深刻印象。黛安收到風，香港體育學院同恒基地產旗下嘅MCP新都城中心合作，即日起至月底，喺新都城中心2期同3期舉辦「體通體透體育學院」主題活動，除咗展示運動員嘅精采時刻同裝備，大家更可免費體驗單車、賽艇、滑浪風帆同劍擊運動嘅設備㖭！

公關姊妹話，體驗區部分設備係由香港體育學院直接移師到商場，仲有專業教練指導大家如何體驗賽艇同滑浪風帆，完成指定任務，更可贏取體院送出嘅限量精美禮品。而H‧COINS會員更可報名參加本月16日、23日同31日嘅運動員分享會，聽下各位運動員嘅勵志故事。