張栢芝細心教2歲半孻仔認字 網民︰有耐性好媽媽

正身在深圳隔離檢疫的張栢芝，前晚在IG限時動態發布短片，片中她以平板電腦的學習軟件教兩歲半細仔張禮承（Marcus）認字，雖然母子在片中未有露面，但Marcus大講BB話勁可愛，栢芝更叮囑囝囝「冷靜」，果然有耐性。

栢芝於18年底秘密誕下細仔「小王子」Marcus，Marcus至今兩歲多，已牙牙學語，開始懂得講單字。栢芝北上內地開工亦有攜Marcus同行，母子現時在深圳的酒店隔離檢疫。前晚，栢芝享受親子時光，以平板電腦陪囝囝學生字，短片中聽得她普通話及英語夾雜，以雙語指導囝囝，又叫「慢慢，冷靜啲，take time」，循循善誘教導Marcus認字。雖然片段沒有拍到Marcus的靚仔樣，但見到其又肥又粗的手指仔，加上他在鏡頭後密密講BB話，非常可愛。

密密開Live超勤力

栢芝在隔離期間吃得健康清淡，親自下廚炮製西蘭花、大豆芽炒魚片及炒蝦仁等港式小菜，大曬廚藝。此外，栢芝在酒店除了照顧小朋友，亦為工作忙到爆，不但幫自家服飾品牌拍片宣傳，亦開直播分享美容、護膚心得。直播中，她示範噴蒸氣卸粧、敷面膜等，這位靚媽素顏上陣依然明艷照人。不過，昨午她在限時動態狂呻︰「甚麼時候才14天！」看來上周才開始隔離的她已「頂唔順」呻悶。此外，栢芝又曾開直播，大方分享如何用針綫幫二仔Quintus（謝振南）縫好馬騮公仔，果然是全能媽媽。

撰文︰Steven

美術︰梁政敏