任創作導師教創作 林奕匡籲學員習慣挑戰自己

林奕匡（Phil）最近聯同黃妍和葉巧琳，為《馬爹利飛「樂」學堂》擔任星級創作導師，分別為音樂比賽中排名前三的參賽者提供培訓。Phil本身是唱作歌手，他的學員同樣有寫歌習慣，Phil特別分享心得︰「創作頭十隻歌通常比較容易，諗到咩就寫咩，但成長之後，就要學識跳出comfort zone（舒適圈），習慣挑戰自己，逐漸加大範圍，創作空間先會變得廣闊，先可以做出唔同類型嘅音樂。」

香港樂壇近年有很多變化，問Phil入行是否易事，他認為入行從來都不容易，更直言會先打擊學員︰「做音樂要有種不平凡，過於平凡嘅人就算有機會入行，都未必可以持久。要真心鍾意音樂，想比人做得更多、更好…入行真係好辛苦，亦有可能要做自己唔想做嘅事情，要確認可以衝破障礙，先可以繼續行落去。」