談情說性 伍詠薇後悔無跟契細佬上床 陳山聰︰家姐不嬲都傻㗎

伍詠薇（伍姑娘）與契妹陳敏之及契細佬陳山聰向來感情要好，一向言論大膽的伍姑娘日前為敏之的網上節目任嘉賓，除了大談性話題外，伍姑娘更自爆後悔無跟山聰發生性關係，認真語出驚人。山聰昨午回應《晴報》時笑指契姐「吹水唔抹嘴」，又表示︰「太太（Apple）都知家姐（伍姑娘）係玩，唔使講太多！」

近日陳敏之進軍YouTube開設個人頻道，節目頭炮邀得契姐伍姑娘當嘉賓。敏之及伍姑娘暢談相識經過，原來二人緣於02年一同參加無綫台慶的表演項目，當時敏之因遲到惹來伍姑娘不滿，後來深入認識後，才知道大家性格同樣大癲大肺，因而非常投契。二人後來更與陳山聰上契成為姊弟妹，三人友好關係維持至今足足19年。早年伍姑娘曾與山聰不和，她亦大方重提舊事︰「山聰要扣番六年，因為我哋嗌交呀！不過呢個仔會錫番佢多啲！」

山聰被爆「天生異稟」

伍姑娘在節目中大膽談性事，揚言寧願愛「天生異稟」也不要靚仔，更刻意擺山聰上枱︰「我心諗點解我無搞過（發生性關係）陳山聰呢？」敏之即追問山聰的重要部位大小，伍姑娘即說︰「大！佢（山聰）同我講佢大，細佬講嘅嘢我就信，佢無除過條褲畀我睇，放心！肯定（大）呀，有人唱番出嚟㗎！（邊個唱？）佢結婚前啲對手呀！」

伍姑娘更大膽說︰「如果上契前同陳山聰發生關係，可唔可以再上契？」她自問自答︰「我覺得我可以（上契），人生嘅嘢，緣份可能整定要你歎過，之後再做兄弟姊妹都得呀！我唔會同自己屋企人亂倫咪得囉！（上完契就唔會？）上完玩仲興奮呀！」

取笑契姐「嫌命長」

對於慘被擺上枱，山聰昨日回應時笑說︰「佢兩條友仔，嫌命長，家姐（伍姑娘）不嬲都傻㗎啦，唔使理佢，不過幫到阿妹（敏之）宣傳就由佢啦，陳敏之要請我食飯。」問及過往伍姑娘可曾手多多？山聰斬釘截鐵道︰「佢得個講字！」會否擔心伍姑娘的言論令太太Apple不悅，他笑言︰「無！佢知家姐係玩，唔使講太多！」提到伍姑娘踢爆他自稱「天生異稟」，山聰堅拒承認：「我從來都唔會讚自己，我乜都最屎嘅，做戲、唱歌、樣樣都屎！我一生人得兩樣嘢叻，娶咗個好老婆Apple，生咗個Jaco仔！」

此外，敏之在節目中追問伍姑娘為何暴瘦，伍姑娘透露17年在內地工作期間，經歷不少挫折而消瘦，至今也長期保持48公斤體重，暫時也不打算增磅。前晚伍姑娘在FB轉發節目，並留言︰「大家多多支持敏之第一集同第一次做呢個平台嘅主持，第二集都仲係我做嘉賓，千祈唔好唔睇，仲有好多好爆嘅嘢要爆出嚟㗎。」

撰文︰Steven

美術︰梁政敏