稱林家棟「大阿哥」 謝賢拒與霆鋒父子檔合作

謝賢（四哥）與林家棟前晚到圓方出席電影《殺出個黃昏》首映，同場還有跟四哥同樣叱咤粵語片年代的周驄，老拍檔久別重逢份外興奮，但周驄上台時險些絆倒，幸得工作人員及家棟攙扶。四哥在片中飾演殺手，新片監製家棟透露四哥已先睹為快欣賞電影：「四哥睇過幾次啦，我特登拎去佢屋企畀佢睇，佢睇完嘴角微微上揚。」四哥憶起多年前認識家棟時，對方只是「o靚仔」，如今已兼任演員和監製，他改稱家棟做「大阿哥」。家棟自爆︰「有一年我喺舞台劇《新上海灘》扮四哥，佢嚟探班，仲同我講『o靚仔，扮我扮好啲』，估唔到咁多年後可以同你合作。」四哥即謂︰「我專登唔死就係為咗拍佢。」嚇得家棟大呼︰「嘩，咁好大壓力喎！」

已屆84歲的四哥，直言會退休不再拍戲，家棟即笑謂︰「唔好信佢講，我搵佢嗰時都係咁講。」問四哥可會考慮和兒子謝霆鋒合作？他笑言︰「唔好，費事畀佢威晒。」四哥又指女兒謝婷婷身在加拿大，早前亦見過外孫女。

採訪︰倪小珊

攝影︰林良明