10歲愛犬患癌 林夏薇淚崩：驚狗狗醒唔番

林夏薇（薇薇）、陳展鵬及馮盈盈等前晚到電視城出席《逆天奇案》慶功宴，慶祝劇集成為「2021年兩綫劇集收視冠軍」。不過薇薇到場時眼濕濕，原來她的十歲愛犬「金豬」患上癌症，要接受全身麻醉檢查，她提到愛犬病情時忍不住激動爆喊。

愛狗如命的林夏薇，前晚提到「金豬」的病情時非常憂心，表示愛犬接受電腦斷層掃描檢查：「睇下狗狗腫瘤情況，再決定係咪做手術，頭先佢全身麻醉，真係好驚佢醒唔番，好彩佢醒咗我先趕嚟慶功宴。」薇薇忍着淚指「金豬」年紀大，怕牠患病痛苦：「狗狗好有靈性，可能佢唔想我唔開心，但我知道佢病又唔敢喺佢面前喊，我會盡最大努力搵醫生救佢，始終佢年紀大，希望佢健康，會畀多啲正能量佢。」

除了「金豬」生病，原來薇薇雙親在廈門飼養的另一愛犬「虎仔」日前不幸離世，連番打擊令薇薇十分傷心：「連續兩日有壞消息，我接受唔到，最擔心係屋企人，因為狗狗陪咗佢哋13年。」她坦言太傷心，原本打算缺席慶功宴：「我心情好複雜，但多謝大家支持套劇，有呢個成績值得開心。」

陳展鵬享受囡囡按摩

同場的陳展鵬表示父親節當日放假，可以好好慶祝：「我分別同爸爸、外父走兩場食飯，囡囡（小豬比）太細個仲未識慶祝，但返屋企佢好乖幫我拎拖鞋，又同我按摩，已經係最好嘅禮物。」至於馮盈盈提到《逆天奇案》大結局獲30.2點收視佳績時說：「我研究拍花絮片回饋觀眾，好多人憎我個角色，可以拍我被薇薇糟質嘅片。」

採訪：Pauline

攝影：林良明

美術：顏玉玲