AO歌王楊立門獻金曲曾浩輝伴奏 歌聲緬懷皇都戲院

北角皇都戲院早前舉辦「尋找你我他的皇都」歷史體驗活動，成為城中熱話。黛安聽公關姊妹分享，戲院喺50、60年代曾舉辦過唔少殿堂級中西音樂表演，所以近期活動亦以歌聲緬懷皇都歷史，喺戲院商場搭建小舞台，畀唔同音樂人表演。

其中一場係由「AO歌王」、前發展局常任秘書長楊立門表演，佢仲唱咗幾首經典金曲，例如The Beatles嘅《Let It Be》、陳百強嘅《眼淚為你流》、林子祥嘅《最愛是誰》同張學友嘅《愛是永恆》，佢哋仲搵嚟有「神探輝」之稱嘅前衞生防護中心總監曾浩輝彈琴伴奏㖭，真係好精采。因為疫情關係，表演只能錄影後放上YouTube頻道播放，但佢哋兩位都話今次表演好難忘，期望日後新世界完成戲院保育後，重新成為本地文化地標。

想睇兩人表演可【按此瀏覽】。