演金輪法王險中暑 張雷孖劉德華登台似披頭四出巡

現年66歲的張雷，日前接受楊盼盼主持的《盼你賞面》訪問，既是演員又是特技人的他，最為人熟悉的經典角色，要數83年劇集《神鵰俠侶》的「金輪法王」。他在劇中與「楊過」劉德華打到飛起，更分享不少鮮為人知的辛酸史。

入行逾40年的張雷，自小習得一身好武藝，龍虎武師出身的他，機緣巧合下轉戰幕前，在70、80年代拍攝過《C.I.D.》、《神鵰俠侶》、《天龍八部》等多套劇集，同時擔任多齣電視劇的特技人，其中《神鵰俠侶》的金輪法王一角，令觀眾留下深刻印象。

張雷憶述︰「當年做金輪法王，記得拍攝時夏天好熱，劇情講我要帶蒙古兵打中原，蒙古兵要列隊，點知一個個中暑暈低，於是我諗『真係咁熱咩』，我又企出去一陣試下，點知真係眼前一黑，原來當時氣溫係41、42度。」雖然辛苦，但張雷指拍攝過程十分好玩，跟劉德華的戲份更是見一次打一次。演罷金輪法王後，他與華仔到新加坡登台，笑言感覺好似當年殿堂級樂隊披頭四來港一樣，當步出機場時，被大批人包圍，場面墟冚。

揀靚車拍撞車戲

心繫飛車特技的張雷，參與多套電影，其中最為人熟悉的是電影《最佳拍檔》系列的特技畫面︰「參與好多集《最佳拍檔》，發覺觀眾鍾意睇啲靚車撞，所以專登喺加拿大訂啲靚車嚟拍撞車戲。」此外，張雷將飛車特技技術傳授給徒弟，問到張雷對徒弟的挑選準則？他說︰「要有基本技術及基本膽識，但又唔可以太大膽，因為咁會容易出事，反而要怕死、冷靜先得。」

撰文︰倪小珊

美術︰梁政敏