蘇格蘭返港隔離 喬寶寶自備公仔麵對抗劣食

早年已移民蘇格蘭的喬寶寶近日返港，準備本月底出席有份演出的電影《我的印度男友》首映。正在酒店隔離的他昨日接受《晴報》訪問，笑言叫外賣時不慎中伏，幸好他早已準備公仔麵及乾糧。他又透露居於英國的胞姊一家亦不幸確診新冠肺炎，令他擔心不已。

目前在青衣某酒店隔離的喬寶寶，透露昨日踏入隔離第十天，由於英國屬高危地方，所以回港後要隔離21日。喬寶寶表示︰「如果悶就睇電視，同屋企人傾下電話、上網，今次返嚟會逗留兩個月，我都無返嚟香港半年，今次返嚟出席首映，同探下親朋戚友。」最近香港隔離營的劣食隔離餐成全城熱話，雖然喬寶寶在酒店隔離可以叫外賣，但他昨日點一道長通粉時亦不慎中伏，幸好他帶定大堆麵食乾糧，又有即沖奶茶，準備充足。

妻子印度親戚染疫亡

喬寶寶透露自己與身在蘇格蘭的家人已接種疫苗，他與太太接種阿斯利康疫苗，而媽咪及細仔等則打輝瑞疫苗。問他打完疫苗可有不良反應？他說︰「我打完第一針之後有發冷同發熱，左邊膊頭痛咗一日，太太就痛咗三日，同埋有發燒。」他指居住在李斯特城的胞姐、姐夫及子女一家六口早前不幸確診新冠肺炎︰「我姐夫最辛苦，喺屋企瞓咗十日。」

提到印度疫情失控，喬寶寶指太太一名居於當地的姪兒亦不幸染疫身亡︰「姪兒係個30幾歲嘅後生仔，最初係咳同發燒，後尾愈嚟愈嚴重，入咗院兩日就走咗。」

喬寶寶不禁連珠炮發斥責說：「印度啲廟宇仲多過學校同醫院，滿天神佛，導致市民太過迷信；好似03年沙士咁，當時印度人無乜事，所以就以為今次都會無事。咁啱早前印度有選舉，好多遊行示威，加上佢哋啲口罩幾乎係homemade，好多都係用手巾仔就當口罩，劣質好多，唔似我哋戴緊嘅口罩咁有防禦力，所以先爆發得咁勁。」他無奈指印度太少人打疫苗︰「依家得幾個%嘅人打咗疫苗，幾時先去到一半？其實愈早打愈早脫苦海，之前我老婆啲兄弟有得打時又唔打，依家就算想打都無得打。」

撰文︰倪小珊

美術︰梁政敏