《愛•回家》上下關心吳偉豪 周嘉洛幫口：學識互相尊重

網上日前流出疑似「朱凌凌」吳偉豪的不雅沖涼片，已報警處理的吳偉豪連日「潛水」，昨日亦缺席《愛•回家之開心速遞》宣傳活動。而「熊家」上下齊齊開腔支持吳偉豪，「安仔」周嘉洛亦不擔心「朱凌凌」在劇中會被消失。

「朱凌凌」陷入不雅片段風波，《愛•回家》一眾演員均開聲力撑，劉丹幫口說：「大家喺呢個時候幫下手，講多啲安慰說話，後生仔嚟講根本唔算係啲咩嘢，唔好發大嚟講。畀佢（吳偉豪）冷靜下，等件事慢慢丟淡，後生仔受唔到太大刺激。」

至於周嘉洛及蘇韻姿已經慰問吳偉豪，對方亦有回覆，問他們會否擔心吳偉豪在劇中被消失？周嘉洛說：「我就唔擔心。」問他對不雅片段事件有何看法？他說：「我個人覺得社會有唔同標準，件事交咗畀警方處理，大家睇清楚件事先，咁早妄下判斷對吳偉豪唔公平，希望大家學識互相尊重，畀啲空間佢。」提到周嘉洛及蘇韻姿在《大整蠱》中疑被劉丹踢爆戀情？周嘉洛輕鬆說：「丹爺好鍾意講笑，其實得啖笑，大家唔使認真，我都襯唔起佢（蘇韻姿）。」

劉丹讚小糯米畫畫靚

另外，提到周日便是母親節，呂慧儀表示當日要為《開心大綜藝》任嘉賓，所以已提早跟兒子到主題公園慶祝。她笑說：「個仔係咁用我嘅錢去掟公仔，好貴呀，但見到佢好努力掟咗隻公仔送畀我，我都好冧。」劉丹則表示會一家人慶祝，孫女「小糯米」通常會畫畫送給嫲嫲：「無論畫成點，起碼都有心，無論畫得好唔好，我哋都會覺得佢畫得靚。」

採訪：Pauline

攝影︰林良明

美術：梁政敏