D2 Place 設初夏の祈願庭 粉蝶花海美不勝收

踏入初夏，好多商場都加速換新裝，布置新打卡點畀大家影靚相。有公關姊妹報料，D2 Place同香港大塚製藥有限公司旗下Pocari Sweat ion water，由即日起至5月30日，率先呈獻以淺藍色粉蝶花為靈感、共設7大日系景點嘅「初夏の祈願庭」，每個景點都靚到好似置身喺日本茨城國營常陸海濱花園嘅粉蝶花海現場咁，超浪漫呀！

公關姊妹力推2個必去打卡熱點，包括髹成藍色嘅千鳥居、畀粉蝶花海包圍嘅富士山同湖景，後者聽講喺天氣晴朗時，湖水可以倒映山景，好似天空之鏡咁，夢幻又浪漫。

黛安就建議星期六、日到訪，因為屆時商場會免費派發350毫升支裝ion water，行到攰就隨時有得water up。另外，活動期內喺D2 Place一、二期指定商戶消費任何金額，憑即日有效機印發票，就可以換領「ion water x D2 Place初夏の祈願庭」Tote Bag一個，數量有限，要把握先機啦。