首度夥古天樂拍廣告變粉絲 黃翠如自嘲︰我好似臨記

黃翠如早前與古天樂（古仔）合作拍攝馬來西亞品牌汽車香薰廣告，已於日前在網上發布。翠如在廣告中化身女神與古仔拍檔，笑言令她開心五天。昨午翠如接受《晴報》訪問時直指廣告如同電影般大製作，更自嘲︰「我在尾段先出場，感覺自己好似臨記！」

全長約兩分半鐘的廣告，有古仔在彌敦道飛車及他與「大佬B」吳志雄在貨倉交易的場面，充滿90年代黑社會電影的氣氛。另一邊廂，故事交代古仔交易後駕車返回大宅，廣告女主角黃翠如在尾段穿上晚裝出場，長髮飄逸冧爆古仔，原來她獲贈女神系列汽車香薰、而古仔亦有紳士系列汽車香薰。難得與古仔合作兼有兩句對白，昨午翠如忍不住在IG轉發該廣告兼留言︰「經理人告訴我，可以同古先生一起拍廣告，我的回覆是唔收錢我都要拍。可以在這個廣告出現五個Shots（鏡頭），我開心了五天。」不少網民讚廣告如同電影預告片；有粉絲亦稱讚翠如有女神氣質。翠如老友洪永城亦在發帖留言抽水︰「我要成為紳士！」

不敢NG 一Take拍完

昨午翠如受訪時透露該廣告在香港僅在網上發布，她坦言見到該廣告製作龐大也感驚訝。更笑稱︰「去到我覺得自己似『臨記』，因為製作好似拍電影一樣，廣告突然加咗我兩句對白，感覺自己如同以前初入行拍戲得一、兩句對白的感覺！」提到首度與古天樂拍檔，翠如強調不敢NG，因此成功一Take過完成。她並笑言︰「以前都未試過咁近距離見到佢，完成拍攝臨走時影合照自己都硬晒呔，好似TVB節目啲獎品小姐！（老公蕭正楠（Edwin）睇完有何意見？）佢睇完都話好大製作又好有電影感，最特別係呢個廣告嘅導演曾拍Edwin入行後第一個MV，而志雄哥見到我都話佢介紹Edwin拍第一齣戲，染金毛演《監獄風雲之少年犯》，講起我都覺得好開心、好得意！（酬勞如何？）好好，喺疫情下有廣告好感恩！」對於可希望在電影中與古仔合作？她笑言︰「我心頭唔高，下次可以喺訪談節目訪問佢已經心滿意足！」

撰文︰Steven

美術︰梁政敏