認愛後首次情侶檔現身 盧慧敏冧讚陳卓賢夠Sweet

MIRROR成員陳卓賢（Ian）與混血索模盧慧敏（Amy），因拍ViuTV新劇《無限斜棟有限公司》而撻着，二人昨日「攞正牌」情侶檔現身宣傳定情劇，雖然未有親暱舉動，但Amy受訪時忍不住大讚男友，相當甜蜜。

陳卓賢與盧慧敏昨日孖前輩吳家麗、黃光亮及葉童等，出席新劇記者會。Ian與Amy認愛後首次情侶檔現身，不過Ian笑言不覺得彼此是情侶檔，但承認這套劇帶給他很多。問Amy當時與Ian邊拍劇邊拍拖是否很sweet？她甜絲絲說：「佢（Ian）本身都好sweet！」Ian則笑說：「我無做啲乜，大家好自然咁一齊，每日拍好多個鐘，大家相處好真實，覺得大家幾夾。」

至於將來會否介意情侶檔工作，Ian認為大家工作範疇不同：「我哋有共識專注做自己嘢，無話特別想但亦唔會抗拒。」Amy立即附和男友，表示大家想法一致。另外，提到MIRROR演唱會再加開一場，開心的Ian呼籲粉絲別買黃牛，又自言若條件許可，即使開足十多場他也不會呻攰。

Ian籲粉絲勿買黃牛

不過有粉絲在網上留言，指有位Ian歌迷聲稱幫三位「鏡粉」買飛，但收錢後卻疑似走數，Ian說：「我唔清楚佢係咪我fans，但MIRROR出活動都見到佢，都認得嘅，真係再次鼓勵大家用正確途徑買飛，我哋都擔心有人借演唱會去做非法行為。」

同場的吳家麗及太保提到廖啟智（智叔）病逝，吳家麗說：「我哋拍劇集《薛仁貴征東》合作過，智叔係個好好嘅人，有好多好作品留畀大家，呢樣亦係演員唯一可以留低嘅嘢。」

採訪︰Pauline

美術：梁政敏