婚後與其他異性絕緣 張新悅餵森美進食勁尷尬

森美與張新悅昨日以有機大使身份出席活動，二人在宣傳片中扮演夫妻，張新悅笑言自從結婚兼離開娛樂圈後，已鮮有接觸老公以外的異性，所以拍攝時要餵森美吃東西，令她非常不好意思。

森美與張新悅同樣注重家人飲食健康，張新悅會在家中種蔬果，而森美則表示與電台同事每周向本地農夫訂有機蔬菜：「之前一直擔心食物會唔會有農藥，自從食咗有機菜之後就無呢個煩惱。」

復出唱歌要老公批准

二人拍攝宣傳短片推廣有機生活，他們在片中扮演夫妻，張新悅更與本地樂隊FreshLife合作，創作及唱出主題曲《簡簡單單原來很快樂》。張新悅坦言婚後多年，生活一直被老公與女兒包圍，甚少接觸其他異性：「突然多咗個『老公』，有幕我要餵森美食嘢，真係好尷尬；而且FreshLife幾個男仔好年輕，計年齡我生得佢哋出喇！」

張新悅相隔近20年後再獻聲唱主題曲，問她可會復出做歌手？她說：「如果純粹玩下就得，但做番歌手就唔會啦。睇下有無人搵我，又要睇老公批唔批准。」身為四女之母的她，平日在家也會母女檔合唱許冠傑的歌曲；而森美亦說：「啲仔女都會同我一齊唱Beatles嘅歌，一齊夾band。」森美大讚張新悅外表、聲綫一樣凍齡，逗得她十分開心：「我個真老公都無咁讚我！」

採訪︰Pauline

攝影︰林良明

美術：梁政敏