羨慕雙親勁恩愛 高海寧爆父母互夾腳趾食飯

高海寧（高Ling）、胡諾言及周志康昨日到觀塘出席戒煙活動，高Ling指父親有30多年煙齡，近年終成功戒煙。高Ling言談間忍不住大爆父母超級恩愛，平日食飯時更會在枱底互夾腳趾「十趾緊扣」，相當肉麻。

高海寧指父親近年多咳多痰，自己及弟弟亦有鼻敏感，所以力勸父親戒煙：「我一聞煙味就打乞嗤，爸爸為我哋戒煙後身形圓潤咗，我哋都陪佢做運動。」她大讚父親在戒煙過程中非常堅持：「起初我會買零食畀爸爸頂癮，同埋會陪佢行山做運動。爸爸同媽咪好鍾意游水，所以佢哋一齊去游水，健康咗好多。」

胡諾言唔准仔女做電燈膽

高Ling搞笑指父母多年來經常恩愛放閃：「每次食飯，佢哋都會喺枱底互相夾腳趾。（要求將來男友一齊夾腳趾？）呢啲係個人喜好嚟嘅，我仲未識得夾腳趾，不過都希望將來好似我爸爸媽媽咁恩愛。」另外，高Ling表示80多歲的公公近日做身體檢查時，發現肺穿窿：「公公有吸煙習慣，但佢年紀大，要佢戒煙真係好難，惟有勸佢食少啲。」

胡諾言得知高Ling父母愛玩「十趾緊扣」亦相當有興趣：「不過我同老婆（陳琪）無呢個習慣，只係每次食飯都好自然坐埋啲，叫小朋友唔好坐我哋中間，呢啲都係兩夫妻嘅情趣。」近年愛上跑步的他，等兒子長大一點，便會兩父子齊齊去跑。

採訪︰Pauline

美術：梁政敏