林盛斌︰第一日做DJ接「哥哥」死訊

林盛斌（Bob）於2003年4月1日返新城電台做DJ，亦是他入行第一個工作日，原本打算輕輕鬆鬆完成工作、準時放工，卻在臨收工前收到「哥哥」張國榮墮樓身亡的噩耗。

Bob清楚記得當日手忙腳亂的狀況︰「第一日返工，過咗大半日都無乜嘢，點知臨收工六點幾諗住走，突然公司啲人癲咗，『唔走得！全部要留低幫手做嘢，要做好多特輯！』嗰日我新入行，仲諗住收工返屋企食飯，結果當然無得走，仲即刻去公司library搵資料同唱片，再交畀其他DJ幫手做嘢，真係手忙腳亂，始終第一日返工就遇到咁大件事，仲要趕住寫稿，成個人都好爆炸。」