周嘉洛︰一出場被亂槍掃射

周嘉洛憑《愛‧回家之開心速遞》的「廢青」金城安一角成功入屋，還帶挈他奪得最佳男配角，原來嘉洛早於《愛‧回家》第二季已悄悄加入了劇組，當然那時只是飾演一個無名無姓的角色，他重溫這個角色時也忍俊不禁。

他說︰「嗰場戲係幻想劇情，講張振朗出現搶婚，新娘子龔嘉欣衝出嚟拎住槍掃射婚禮上嘅賓客，其中一個被射死嘅賓客就係我！導演Johnson至今仍經常合作，同佢因為咁而熟絡咗。嗰場戲的經歷真係好難忘，估唔到第一日開工就有想像力咁豐富嘅場面，諗返都好好笑。」