嚴選最美麗口罩小姐 ERROR最驚除罩一刻靜過太空

ViuTV舉辦的《最後一屆口罩小姐選舉》將於下周一首播，ERROR的肥仔（梁業）、193（郭嘉駿）、阿Dee（何啟華）及吳保錡化身隊長親自揀蟀，他們直言眾佳麗除去口罩的一剎那，有驚有喜，身為隊長最難就是表情管理，阿Dee笑說︰「最怕係參賽者一除口罩全場靜晒。」

真人騷《最後一屆口罩小姐選舉》內容別開新面，ERROR四子將會成為隊長，在入圍的40名參賽佳麗中，各自嚴選五位成為隊員，接受不同挑戰及考驗，最後選出冠軍。ERROR的肥仔、193及阿Dee日前率先挑戰《晴報》為他們舉辦的「美貌與智慧笨重先生選舉」，以不同題材考考幾位隊長。雖然保錡因負面新聞纏身，宣布暫別娛圈，未能參與宣傳工作，不過三人依然咬住唔放，取笑保錡是「賤男」及「2021年最新素食者」，為隊友保持曝光率，認真好兄弟。

193自詡「南丫島畢加索」

三人在遊戲中畫出心目中的口罩小姐，當中阿Dee用心的畫功令人驚喜，他筆下的口罩小姐要有楚楚可憐的眼神，眉頭輕皺，相當膚淺。肥仔所畫的美女無手無腳勁陰公，驚嚇度爆燈；至於193則「大筆一揮」，描繪簡單的舉V火柴人，不過他自詡「南丫島畢加索」，更指舉V別有深意：「我要帶領2021年『33YEAH』手勢嘅潮流，唔好再畀姜濤嘅心心（手勢）喇！」結果193因自信過分爆棚，最終順利勝出比賽，獲得一個簡單而隆重的加冕儀式，兩位兄弟亦敷衍吻賀193。

提到節目，三人指外界以為戴口罩一定令人看來更美，事實並非如此。肥仔說︰「海選嗰陣，有啲參賽者睇落無乜特別，但原來係靚女。其中有個參賽者被淘汰之後，我哋叫佢除口罩，點知佢勁靚，我哋求監製畀佢入番圍，但監製拒絕咗。」阿Dee認為隊長要做好表情管理極有難度，他指若參賽者除口罩後發現是美女，大家一定自然地驚歎「好靚」：「但如果參賽者比較一般嘅話，除咗口罩後現場無人出聲同畀反應，全場靜晒，之後就一片浮誇歡呼聲，真係好衰。」

阿Dee意外淘汰監製心水

ERROR參加《全民造星》出道，今次以隊長身份參與，正式升呢，阿Dee笑言起初他們隨自己心意挑選，沒想到將監製的心水參賽者全部淘汰，他又慶幸自己只是隊長不是導師︰「最主要係睇住佢哋點死，哈哈！其實我哋目的都係想自己隊員贏出比賽，過程中提點佢哋，等佢哋改善。」193坦言自己是選秀節目的過來人，明白有時候一句無心說話，便會得罪觀眾，被憎恨一世，他會提點參賽者多加留意，又說︰「其實我哋真係好好彩，有咁多機會，參賽者入面好多都係藝人、KOL或者模特兒，經驗比我哋多，佢哋好努力，但都未必有咁好嘅機會發揮。（你淘汰完人點算？）我都有話希望將來有機會可以合作。」肥仔笑說如果被淘汰的參賽者無家可歸，可以到193屋企暫住。

【一按睇片】

服裝︰MisterGentleman

撰文︰楊安莉

美術︰顏玉玲

攝影︰潘卓忻、黃紫維、羅灝駿