屈臣氏10年願景 減4成碳排 醫萬名「兔唇亅兒童

環境污染愈來愈嚴重，大家都要好好保護地球。黛安覺得屈臣氏集團好有心，集團同旗下13個品牌，噚日發表社會願景同2030年可持續發展目標，除咗希望做到減排同少用塑膠外，亦希望喺2030年時為1萬名唇顎裂兒童提供免費矯型手術，等佢哋可以重拾笑容！

集團公布嘅願景包括喺2030年前，將電力強度同溫室氣體比2015年減少3成同4成，又承諾喺英國、荷蘭同比利時全面使用可再生能源，亦會逐步去除無必要嘅產品包裝等，同時希望2025年時有20%產品包裝轉為可再生塑膠物料。

集團首席營運總監同集團（亞洲及歐洲）CEO倪文玲話，集團一直對社會有強烈嘅責任感，希望透過環球業務網絡同訂立目標，創造一個更美好嘅世界，令更多人能會心微笑。