與吳肇軒玩搓泥 阮小儀冧爆︰有少少發姣

阮小儀主持的香港開電視節目《小儀與13型男》，新一集邀得「大細路型」的吳肇軒當小儀的約會對象。二人在節目中除了模仿經典西片《人鬼情未了》搓泥整陶瓷，又到樂園大玩遊戲，難怪事後小儀對這位小鮮肉心心眼。

27歲的吳肇軒是影壇新貴，外形討好曾被封「翻版梁朝偉」，他在節目中盡騷「大細路」的貪玩性格，但當與姐姐小儀談及事業、愛情觀時卻表現成熟。小儀有讚無彈︰「我同吳肇軒相處一日，佢除咗有『大細路』特質，亦有成熟男潛質，佢喺某啲時候好照顧身邊人。」她自言相處一天後已對吳肇軒有feel：「最初我無心心眼，對我嚟講吳肇軒係小朋友，但依家我有少少發姣感覺，若然同你呢類人坐低飲咖啡，其實都幾快樂。」

小鮮肉鍾情白滑女生

吳肇軒得悉小儀形容他是大細路時說：「我鍾意有童真嘅感覺！咩叫大人先？成熟處理問題？收入穩定？有固定嗜好？如果係咁，我寧願keep住做『大細路』。」問他覺得自己是一個怎樣的男朋友？他超有自信說︰「我係一個你同我拍拖，會愈來愈鍾意我嘅男朋友。」

吳肇軒又透露自己拍拖次數多過五次︰「我需要有一個人喺我身邊，我都有脆弱嘅時候。我拍拖時，鍾意照顧人哋嘅諗法同情緒，唔開心就會同對方傾偈，所以我吸引到啲鍾意講嘢嘅女朋友。」吳肇軒自言已準備好以結婚為目標的交往︰「我嘅擇偶條件係咪靚女？曾經都係，我鍾意皮膚比較白、甜美，好鍾意笑嘅女仔。」

撰文︰Steven

編輯︰李潔盈

美術︰顏玉玲