醉後踩單車仆崩牙 張惠雅補完牙即去紋身

張惠雅（Regen）日前在長洲相約朋友飲酒，飲醉後即興踩單車，誰知炒車仆崩門牙。不過，Regen懶理變崩牙妹，更狂影相放上網，拖足兩日才去補牙變回靚樣。Regen補完牙後立即走去紋身，又搞笑稱整牙比紋身更痛！

張惠雅日前炒車後，連日在網上分享復原情況，崩牙的她搞笑地拍片表演「漏風」式朗誦，又強調臉上的紅印是炒車擦損所致的傷勢，絕非生暗瘡。她受傷後拖足兩日才肯見牙醫，又自爆本來打算等多一日看牙醫，幸好熱心的許廷鏗擔心她的情況，又幫她預約整牙。

Regen上載搭船自拍，又留言說︰「食食下飯見到許醫生（許廷鏗）嘅留言，好感動……當我聽到一個專業人士口中講可能會感染，我真係驚喇，然後就麻煩許醫生幫我預約今日（前日）有開門嘅診所，好專業，真係，佢好錯愕我仲未去整牙但係整咗一日蛋餅，挑戰牙醫嘅底綫，真係好專業。」及後她再po露齒自拍，只見牙齒已回復完整︰「靚靚，係打麻醉針驚到喊咗出嚟，肉酸咗少少。原本半小時完成，補完我要求靚多少少，所以個幾鐘。」

紋狗狗圖案

未驚過的Regen，剛補完牙不久，便立刻忍痛跑去紋身，只見她在右邊鎖骨下方紋了一隻土佐犬，原來是她人生第一個紋身，又表示「好靚好鍾意！」有網民留言問她整牙跟紋身哪一樣較痛楚？Regen秒速回答︰「整牙！」隨後她又試用新相機，上載幾張單人照後，品評說︰「塊面損晒都影到個樣唔錯，陽光很好，部機都好好。」

撰文︰Pauline

編輯︰李潔盈

美術︰梁政敏