李香琴病逝享年88歲 女兒︰佢好似訓咗覺好安詳

「一代奸妃」李香琴縱橫演藝圈超過60年，昨午突然傳來琴姐離世的消息，據知，琴姐患上腦退化症多年，她昨日在家中進食期間突然失去知覺，其後送往醫院證實死亡，享年88歲。琴姐多年來在圈中熱愛提攜後輩，契仔契女滿天下，眾人皆對琴姐離世表示不捨。

資深演員李香琴昨日離世，女兒蕭紫筠昨晚接受《東張西望》電話訪問時稱︰「十年前佢已有輕微中風，亦有認知障礙及柏金遜症，開始唔認得人，醫生都話佢會退化得好快。」她又透露母親的病情在一個月前轉差，除原有工人外，亦聘請了特護（私家看護）照顧她。蕭紫筠續稱︰「今朝（昨晨）同琴姐沖涼及修甲，食午飯期間，佢突然定晒、唔吞，又唔瞓覺，姑娘諗住幫佢扣喉，但佢已經無晒知覺。去到醫院，醫生話琴姐送到醫院已經無晒脈搏，瞳孔亦無張開，話佢已過身。我哋傷心一定有，個個都錫琴姐，但值得安慰嘅係佢離開時好似瞓着覺咁，好安詳，琴姐嘅朋友都唔好咁傷心。」

琴姐與炳哥最佳拍檔

另外，胡楓（修哥）得悉相識半世紀的好友離世，修哥眼泛淚光稱︰「個心好唔舒服、好悲痛，一個一個唔喺到，尤其係阿琴，我識咗佢60年有多，阿炳（譚炳文）又係……咁樣真係唔知點講。阿琴同我合作時多數演一個喜歡我嘅人，佢真係好靚。」至於契女關菊英昨午則透過經理人公司回覆︰「收到消息都心情難過，真係無任何回應，多謝大家關心，希望佢嘅家人節哀。」

琴姐將大半生奉獻給演藝圈，演出作品逾400部，早期擅演反派，如西宮娘娘、奸妃及後母等角色，演得愈奸、觀眾愈讚。後來於72年加盟無綫，參與長壽節目《歡樂今宵》的演出，包括與譚炳文合演趣劇《大鄉里》，其後二人更經常以情侶姿態登台演出。琴姐在無綫及亞視都拍過不少經典劇集，如《溏心風暴之家好月圓》及《再見艷陽天》等，令觀眾留下深刻印象。可惜琴姐近年健康轉差，因而告別幕前，深居簡出，出入亦要以輪椅代步。

撰文︰Steven、Pat

編輯︰陳禮恒

美術︰梁政敏