兒子做導演勁嚴格 薛家燕狂呻︰唔記得我係阿媽

薛家燕早前為代言的馬來西亞品牌拍攝新廣告，由於疫情關係未能飛大馬拍攝，廣告商便邀請家燕姐兒子石耀庭（Jackson）在香港執導，與大馬導演隔空合作拍攝。家燕姐表示任品牌代言人三年，合作相當愉快，不過她指囝囝工作時要求甚高，令她有點吃不消︰「我記得之前有個廣告要拍動作場面，我打咗十幾次，阿仔都唔滿意，要我再打，佢忘記我係佢阿媽，年紀有番咁上下，會攰㗎嘛！佢都要畀前輩休息下，所以我搵大女珊珊（石祐珊）提佢，叫佢唔可以用我咁盡！」

Jackson笑言今次家燕姐除了講廣東話外，又要大講普通話，加上拍攝時間長，所以辛苦媽咪落力演出。家燕姐聞言說︰「其實同Jackson拍新年廣告係好開心，希望出年多啲喜事。」石祐珊日前牛一，家燕姐與Jackson特別準備生日驚喜，眾人躲在漆黑的房間中，待珊珊入房時才大唱生日歌。珊珊笑說︰「我見出面無晒人，間房又熄晒燈，仲以為發生咩事，嚇死我！」