保持良好心態 老虎都要得嘅！

我哋嘅電台節目《開心日報》宗旨︰希望能日日發放多啲正能量。點先可以令自己充滿正能量？首先要由保持良好嘅心態做起。

心，係靈魂之本。一個人嘅心態，係會令自己對事或對人嘅態度有唔同睇法。每一日喺我哋身上，都可能發生一啲唔好嘅事，積極開朗嘅心非常重要。時刻話畀自己聽︰我掂！提醒自己，只要我去解決，無解決唔到嘅難事，最緊要畀自己一股勇氣去面對。

正如肥媽Maria Cordero唱嘅歌詞入面話齋︰「世事多變，豈可盡如人意？我一切決定都似係無乜意義。我拍住心口，不可不可再失敗。老虎都要得嘅得嘅得嘅得嘅一定得……」無錯，我係成段歌詞咁抄出嚟。但我唔係喺度呃稿費，我係想話，可以幫自己打氣嘅歌，或者戲，係絕對可以幫助增加正能量。

我天生都算係一個樂觀嘅人，但自知容易被人影響，因此當聞到附近勢色唔對，我會立即撤退。

所以我已經好耐無睇苦情片了，今年仲唔夠苦咩？唔好攞自己情緒嚟較飛。當個個都讚《八佰》呢套真人真事嘅戰爭片拍得好，sorry……我入去睇咗10分鐘，發覺情節太沉重，透唔到氣，我即刻撤退。自己知自己事，頂唔順咪死頂，離開嗰個令自己有負能量嘅環境，退一步海闊天空！

前兩星期，我啲朋友發信息話，又有我嘅負面報道，問我有無睇？無喎。因為嗰份報紙一向不盡不實，估到佢哋會搵啲最醜樣嘅相嚟繪影繪聲作古仔，既然都知睇完會被影響情緒，咁做乜仲要畀佢去影響？傻嘅咩？

自己爭取去靠近擁有正能量嘅人和事，心胸自然豁達。千祈唔好畀消耗你情緒嘅人和事常伴左右，要保護好自己嘅心態，先至能夠擁有更美好嘅未來。

又要再唱肥媽嗰首歌︰「要爭取快樂，老虎都要得嘅得嘅得嘅得嘅一定得！」絕對唔會嘥氣！

（本欄逢周四刊登）