疫情下首位歌手開紅館騷 張敬軒諗過用矽膠握手

張敬軒原定去年11月舉行《張敬軒X香港中樂團盛樂演唱會》，但受到社會事件影響而延期一年。今年新冠肺炎疫情肆虐，直至早前疫情稍為緩和，軒仔宣布個唱如期在紅館舉行，一連八場演唱會昨晚便正式在紅館開鑼。捧場嘉賓包括楊受成夫婦、蔡卓妍、周家怡、泳兒、關智斌及霍啟剛夫婦等。不過，因應政府對娛樂場所人數限制，場內只能容納6,000名觀眾。而開騷前，軒仔特別化身紅館帶位員，親自拍了一條防疫片段，呼籲入場觀眾要「罩不離口」及不准飲食。

軒仔昨晚穿上一件鑲滿銀色波波的黑色長褸登上紅館舞台，當唱畢第一首歌曲《酷愛》後，他向現場觀眾打招呼︰「紅館我返嚟喇，大家都返嚟喇！往時喺後台，如果畀我見到咁嘅入座率，一定好唔開心，不過今時今日嘅環境下，見到呢個入座率，好開心，多謝你哋。為配合入場限制，大家坐得鬆啲，無乜幾可旁邊可以放袋。多謝大家，你哋肯嚟，我就肯唱，幾多場都會唱！」軒仔形容這個騷得來不易，曾想過很多不同方法，將創意發揮至最大，他又事先聲明不會有握手位，並笑言︰「有諗過喺咩寶網度買啲矽膠假手，放喺你哋凳底，不過都唔得，所以連場刊都無，靠我把口講出嚟！」

採訪︰楊安莉