夫妻檔拍婚紗廣告 Jessica＠SG笑老公肥咗唔肯減

女子組合Super Girls成員蔡明思（Jessica）與圈外台籍靚仔老公Steven結婚一周年，兩夫妻獲邀做代言人拍婚紗廣告，搵真銀之餘順道慶祝周年紀念。Jessica開心說：「我哋喺結婚一周年嗰日影相，街上好多人見到我都恭喜我，當我新婚。」因疫情所限，二人留在香港拍攝，Jessica自嘲是「大鄉里」，因從不知香港有這麼多影相美景：「老公好開心，因為佢鍾意行山，最深刻係去大欖涌拍攝，個景靚到我有啲震撼！」

Jessica拍廣告前努力keep fit，相反胖了不少的老公卻偷懶：「疫情無得出街，我拍節目成日下廚，搵老公試食，所以佢肥咗好多，但又唔肯運動，只係拍攝前一日唔食晚飯做準備。」談到結婚周年禮物，Jessica竟叫老公送洗碗機：「我好鍾意份禮物，因為唔使再怕有『主婦手』！」