疫情下時裝店結業 林雅詩蝕6位數當交學費

林雅詩早前投資開時裝店，惟疫情下生意重創，最終損手離場，蝕掉數十萬元，但她未被嚇怕，期待疫情後捲土重來。

林雅詩和李日朗昨日到荔枝角出席Party room開幕，林雅詩表示純粹撑場：「諗過搞食店，但要視乎疫情再決定係咪投資。（時裝店生意已經結束？）係呀，蝕咗六位數，係好貴嘅經驗。（再搞生意唔怕有陰影？）咁又無，明白做生意唔一定賺錢，就當交學費，學下嘢。」

林雅詩又指，現時出入境內地各要隔離14日，所以暫時擱置返內地工作的計劃。不過她目前為網上平台做直播，她說︰「係同一班後生仔去探靈，喺萬聖節做第一次直播，去咗一間猛鬼戲院探靈，我中途感覺到有啲嘢，驚嚇親啲小朋友，所以即刻嗌走，最後大家都安全。」她透露正計劃去一間猛鬼學校做直播。另外，她的15歲兒子在英國讀書，當地開始封城，而囝囝有回校上課，令她擔心，若疫情再嚴重的話，或飛往當地照顧兒子。

此外，同樣撑朋友場的李日朗，透露疫情期間做帶貨生意，有食物、護膚品以至珠寶，他笑言︰「試過由朝早食和牛，食咗成個下晝，賣咗600幾份，其實賺呢啲錢唔輕鬆㗎。」他表示初期最不習慣是對着鏡頭賣貨，現時總算做出少少成績，回復信心。

採訪︰Pauline

攝影︰林良明

編輯：黃寶恩

美術：梁政敏