《熟女強人》攤牌戲獲讚 杏兒鬧爆出軌朱栢康嗌痛快

胡杏兒在ViuTV劇集《熟女強人》中發現老公朱栢康出軌，前晚一集，杏兒終與朱栢康攤牌，朱栢康力數杏兒掛住工作不理囡囡，杏兒反駁指為了幫老公完成演員理想，才會辛苦賺錢養家。她爆seed說：「咁多年嚟我喺出面做嘢，失去咗幾多同個女相處嘅時間，呢個係我一生人嘅遺憾，我返唔到轉頭！」

二人投入演出獲觀眾大讚睇得肉緊，有網民留言讚對白貼地，有女觀眾感同身受，表示前夫的藉口跟朱栢康的對白一樣。杏兒興奮說：「就連一啲好耐無聯絡嘅朋友都message我，話我鬧老公（朱栢康）呢場好感動、好激、好痛快！」她表示埋位前，雙方醞釀情緒：「但因機器問題，我哋等咗好耐，但腎上腺素就不停谷，谷到胃好痛，我同導演講頂唔順，可唔可以快啲，因為就嚟要嘔喇！」幸好拍攝過程順利，只拍了兩次導演便收貨。