呻同高海寧咀得少 馬國明：親熱戲要特登申請

馬國明、高海寧（高Ling）及黎諾懿昨日宣傳新劇《C9特工》，飾演夫妻的馬明與高Ling在劇中有親熱戲，馬明笑指高Ling是女神，所以特地申請拍攝咀戲；他又表示會與女友湯洛雯齊齊煲劇，不擔心女友睇完會扭他耳仔。

馬國明昨日以劇中的麻甩菜販造型亮相，展露「飛毛腿」；高Ling亦盡力還原劇中的師奶打扮，戴上膠框眼鏡。提到原定下周播出的《唐人街》臨時被抽起，改播拍完兩年的「倉底貨」《C9特工》，二人表示驚喜，因《C9特工》亦曾被抽起兩次，高Ling說：「我好傷心，所以依家突然播出好驚喜。」馬明指可能因《唐人街》是大製作，或許延至台慶月才推出：「不過我對《C9特工》有信心，雖然製作費唔高，但劇本好，係小品式喜劇，笑中有淚。」

馬明表示與高Ling在劇中有親熱戲：「係我申請返嚟㗎，女神喎！」他透露有床上戲：「我哋演兩公婆，係床上傾偈嘅戲。求婚嗰幕都有錫，我拍嗰陣心跳加速㗎。」他笑言與正牌女友湯洛雯一齊欣賞劇中親熱戲也沒問題，怕被女友扭耳仔？他說：「咁又唔會。」

黎諾懿暴肥22磅

同場的黎諾懿在疫情期間主持網上煮食節目《疫境廚神》，他笑言因而暴肥22磅：「每次做節目前，我都一定先試煮試食，而且教整嘅都係西多士、蝦多士等等油炸懷舊菜。加上同囝囝小春雞出街食飯，每次佢食唔晒都係我執手尾。」他笑說被太太投訴發福，決定努力減肥：「老婆摸我肚腩，叫我還番八嚿腹肌畀佢，因為當年結婚我曬肌影婚紗相。」

採訪︰Pauline

攝影︰林良明

編輯：李潔盈

美術：梁政敏