網上直播教養鳥心得 雀奴陳庭欣甘做「剷屎官」

陳庭欣（Toby）向來是愛雀之人，在家中飼養鸚鵡的她，前晚邀得好友、魔術師甄澤權（Louis），一同主持有關飼養雀鳥的網上直播節目。Toby平日不時在IG分享養雀心得，她笑言鸚鵡經常通屋飛，在櫃頂留下不少糞便要她清理。

陳庭欣前晚在新蒲崗主持自家雀鳥節目《Birdy Wednesday》，邀得甄澤權做嘉賓。Toby表示現時逢星期三在網上開live，分享照顧雀鳥的心得，現已維持了四、五個月。Toby開心表示，節目吸引不少小朋友觀眾欣賞︰「其實用直播方式跟雀友分享心得，都係一種新嘗試，雖然有啲辛苦，諗嘉賓、搬禮物、整海報都係自己做，但做得好開心，只係電腦嘢我唔熟，砌海報都整咗一日，有啲手忙腳亂。」問到男友可有幫手？她甜笑說︰「男朋友有贊助禮物畀個節目，所以我都好多謝佢。」

Toby早前在家中拍片，分享鸚鵡在家中通屋飛的情形，不過有眼利網民錯重點，發現她的居所面積相當大。她笑說︰「因為鸚鵡細隻，先顯得間屋大啫！其實正常，驚啲人覺得雀仔無自由，所以每日都會喺屋企畀佢哋周圍飛。不過櫃頂會留低好多poo poo（糞便），每日都要清理。」她笑言愛雀經常抓住家中吊燈站立︰「因為盞燈形狀似好多支樹枝，但雀仔愈嚟愈重，抓到啲『樹枝』變形，所以佢哋要減肥。」

甄澤權難忘走失斑鳩

同場的甄澤權飼養了多隻斑鳩作魔術表演用途，他說︰「我養嘅係斑鳩，唔係白鴿，依家飼養咗四隻。有次喺馬場表演，綵排嗰陣走失咗一隻，要地氈式搜索，去附近樹林搵咗三、四個鐘先搵到，所以上次Toby走失鸚鵡，我都感同身受。」他表示斑鳩是受管制家禽，要向漁護署申請牌照才能飼養。

採訪︰Pauline

編輯︰李潔盈

美術︰梁政敏

攝影︰林良明