那些年耿耿於懷的憾事 坤哥後悔：無收留狗BB失救致死

許多人會因一時衝動而做錯事，也有不少人因為當刻沒有去做某件事，事後回想覺得懊悔不已。吳業坤（坤哥）後悔當年沒有將一頭流浪狗BB帶回家，自覺間接令牠喪失生命。而龔嘉欣最後悔小時候未有學好鋼琴，長大後卻因手指斷筋，想再彈琴也做不到了。

充滿愛心的吳業坤，曾經因為沒有決心帶走一隻疑遭棄養的牧羊狗BB，間接令到牠失救而死，這件事至今仍令他耿耿於懷。

坤哥表示︰「事件大約發生喺我17、18歲，當時我送女朋友返屋企途中，發現有一隻狗BB畀人放咗喺狗公園。雖然狗仔一直無人理會，但佢都好乖，後來我同女朋友尋根究柢下，發現狗BB係畀人棄養的。我哋好努力去搵人收養隻狗仔，因為我住喺公屋，唔可以養小動物，所以收留唔到佢。當時有個女仔話可以收養狗仔，我哋見佢咁有心，都好信任佢，記得我仲提醒佢一定要帶狗仔去打針，點知過咗幾日知道佢無咁做，我和女友就接走狗仔，帶佢去動物醫院，可惜原來已經太遲了，狗仔最後都死咗。」

坤哥語帶惋惜地說：「雖然呢件事相隔咗咁多年，但我一直都好後悔。嗰時居住環境唔容許養小動物，我諗到可能會畀人投訴，就放棄咗帶狗仔回家，但如果當日我帶咗佢走，可能會救番一條生命，所以依家諗起，仲係好後悔。」

譚嘉儀︰身形嬌小未能做空姐

身形嬌小的譚嘉儀，原來一直渴望做空姐，但遺憾地因身高關係而未能如願。

嘉儀說︰「細個嘅時候，我一直夢想長大後可以做空姐，無奈因為身高唔符合標準而放棄咗。我真係好鍾意周遊列國，每次坐飛機，空姐喺身邊行過，我都用好仰慕嘅眼神望住佢哋，雖然做唔到空姐，但我從來無埋怨過父母生得我咁矮小，因為後來發覺生得細細粒都有好處嘅。以前喺外國讀書，身邊啲同學、朋友都生得好高大，細細粒嘅我反而得到大家嘅呵護，佢哋成日覺得我好cute。就算依家，我覺得長得唔夠高大都有好處，就係唔怕撞到個頭，不過做咗藝員後，就希望可以喺拍劇時一嘗做空姐嘅滋味，始終拍劇可以不受高度限制嘛，哈哈！」

龔嘉欣︰尾指斷筋無法學鋼琴

龔嘉欣小時候曾經學過鋼琴，但只是上了一堂就放棄，現在回想也大感後悔，「點解當初唔認真去學呢？」至今一件樂器都不懂彈奏的她，自覺很無用，她說︰「一直覺得識得彈奏樂器係一件好優雅嘅事，如果時光倒流，我一定會好好去學。」問到長大後為何不下決心完成這件夢想？嘉欣直言因為尾指筋斷了，不能靈活運用，「試過有幾次拍劇，監製原本打算安排我彈鋼琴，但因為我嘅尾指筋斷咗，唔可以彈琴，其實好後悔細個時唔去學，依家想學嚟自我增值都不可以。」

另一件令嘉欣後悔的是事，就跟坤哥一樣沒有收留被遺棄的小動物。「前幾年我同姚子羚一齊住，附近一條村有幾隻流浪貓係由我哋一班村民一齊養的，忽然有一日發現唔見咗其中一隻叫『小花』嘅貓，於是我同子羚四圍搵，甚至搵到走上山頭，足足搵咗一個禮拜，仲貼埋街招，都搵唔到，所以我好後悔當初無接佢走。嗰隻貓好嗲人，我每次路過，佢都會送到我去鐵閘才走，真係好乖。」

撰文：Pauline

編輯：黃寶恩

美術：梁政敏