客串內地劇《三十而已》捱批 高海寧：效果超出預期

高海寧（高Ling）現時在TVB兩綫劇《迷網》及《殺手》中登場，同時亦有客串演出內地劇《三十而已》，更在劇中掌摑女主角江疏影，惹來內地網民暗寸高Ling「未夠班」。

楊明、高海寧及陳曉華等，昨日在將軍澳電視城宣傳劇集《迷網》。提到《三十而已》近日掀起話題，有網民質疑高Ling未夠資格掌摑女主角江疏影，不過收視卻愈鬧愈好，亦有人讚高Ling演得好，她表示︰「好開心客串幾場戲，無諗到話題性咁高。」她坦言沒有因受責罵而不開心，「我只係拍咗兩日，開工首日拍第二場就係掌摑戲，起初唔知道應該真打定借位，事前都有跟對手溝通。導演為咗情緒連貫，要求一take過，最後我哋拍咗兩take搞掂。」問到可有帶挈返內地搵真銀？高Ling表示一直都沒想過賺錢，只當作一個體驗，但效果超出自己預期，有機會都想再拍內地劇。

楊明蝕住開舖

昨日首日實施全日禁堂食，身為五間燉湯店老闆的楊明，表示有很多舖頭上的事情要處理，暫時未看到實際數字。楊明說︰「之前禁止晚市堂食，五間舖嘅生意額共下跌了三、四成，雖然唔係好樂觀，但都希望配合政府抗疫措施，一起捱過去。」他透露暫時會縮短營業時間，又不排除要放棄部分分店。

此外，鄭中基也關心打工仔如何解決食飯地點問題，他昨午在社交網留言：「其實好多工種嘅人都冇地方食飯，大家互相體諒多啲啦。」並以黑底白字貼文表示：「懇請大家喺街見到人食飯嘅話，唔好影相甚至Po上網。人人嘅尊嚴都應該受到尊重。」

採訪︰Pauline

攝影︰林良明

編輯：陳禮恒

美術：梁政敏