網民最愛《殺手》爆炸頭 李佳芯唔鍾意：驚嫁唔出

李佳芯（Ali）昨日出席劇集《殺手》宣傳活動，Ali在劇中的爆炸頭髮型深受網民歡迎，不過她似乎不太受落，更笑言網民專跟她唱反調，擔心維持這髮型會嫁不出去。

昨日記者會公布《殺手》收視，首周七天跨平台總數為29.2點，超過190萬人收看，成為無綫由17年至今，二綫劇集首周收視冠軍。李佳芯希望收視會愈來愈好：「套劇已經係兩年前拍，好多場面都唔太記得，我個角色開始間接殺人，印象中會有掟飛鏢殺人嘅場面。」

提到網民喜歡Ali在劇中的爆炸頭髮型，她笑說：「我都估唔到，我發覺觀眾好似鍾意同我唱反調，我話唔好嘅，佢哋就愈鍾意，我驚我繼續keep住爆炸頭會嫁唔出。（男友陳炳銓喜歡爆炸頭？）我無問佢，不過陳豪就話好睇。」

預告下月有劇開

Ali原定在書展推出新書《心之所往》，可惜書展因疫情延期，她說：「本書一定會如期推出，下星期書局有得賣，簽書會要等疫情好轉啲先，大前提係安全最緊要。」會否考慮在書上留唇印？她笑說：「我無呢個自信，留唇印嘅話似乎好變態。」

另外，有傳Ali被飛出重頭劇《兒科醫生》，由張寶兒頂替其角色，Ali澄清說：「其實公司從來無搵我拍呢套劇，根本唔存在易角呢個情況。我下月中應該會開拍另一套劇，都見過監製，詳情由公司公布。」

採訪︰Pauline

攝影︰林良明

編輯：李潔盈

美術：梁政敏