備戰紅館個唱 梁漢文「食肉減肥」瘦10磅

梁漢文（Edmond）為了迎戰十月的紅館演唱會，近日四出請教身邊好友的減肥絕招；昨日他到電台宣傳新歌時明顯減磅，不過Edmond仍未滿意，揚言要再減多十磅才達標。

梁漢文昨日到商台宣傳新歌《再見童夢零》，在疫情下暴肥了十磅的他，早前嘗試好友鄭秀文的「縮水湯」，成功搣甩六磅後，近日Edmond又進行為期十日的「食肉減肥法」，並參考了容祖兒、謝霆鋒的煮雞肉秘訣，Edmond配合大量運動後，目前已經回復150磅體重，他表示︰「十日已減咗疫情下肥咗嗰10磅，我本身係『食肉獸』，最初聽到食肉減肥法當然好開心，點知去到第四日已經支持唔住，因為一日三餐都要諗食咩肉，其實好想食菜，但我都無偷食。」

入行30周年紀念

雖然積極減肥下略見成績，但Edmond並不建議長期使用這兩種方法減肥。他解釋︰「長遠係唔健康，只係畀大家臨急瘦身用。我嘅目標係可以去番五、六年前嘅140磅，要努力減多十磅，希望到開騷時可以達標。」

提到十月個唱，疫情有機會仍未減退，Edmond坦言能否如期登上紅館舞台仍是未知之數，他表示︰「好多人都問我究竟開唔開得成，我都答你唔到，不過依家決定樂觀向前行，繼續開會同傾rundown，嚟緊仲會推出新歌。呢個係我入行30周年嘅演唱會，亦希望成為疫後第一個重踏紅館嘅歌手，帶啲正能量畀大家。」

撰文︰倪小珊

編輯︰陳禮恒

美術︰梁政敏