無綫小生愛ViuTV女星 沈震軒想同陳欣妍結婚

沈震軒與ViuTV節目《美女郊遊遊》索女主持陳欣妍愛得甜蜜，現年37歲的沈震軒坦言年紀唔細，亦視年輕十載的女友為結婚對象。提到無綫小生愛追ViuTV美女，他即笑稱是另類合作，拍拖也沒受壓力。

沈震軒昨日現身電視城，set了古裝頭的他正準備為新劇《一笑渡凡間》出發去南生圍拍外景。他表示南生圍人多蚊更多：「一到假日，仲多人過彌敦道。同埋我真係好惹蚊，試過被蚊咬到額頭，腫咗一大嚿。」

提到女友陳欣妍日前27歲生日，沈震軒識做地攞定假與女友慶祝：「我自己生日都無放假，但女朋友好注重節日，以前試過佢生日我唔記得請假，真係死罪。」他笑言有送禮物給陳欣妍，但不是戒指：「女友好容易滿足，簡簡單單食餐飯都OK。」他坦言自己已37歲，是時候成家立室，不過未落實結婚計劃。視陳欣妍為結婚對象？他笑說：「每次拍拖，我都會視對方為結婚對象，但想等社會好啲、安定啲先去考慮呢件事。」

拍拖無避忌

提到無綫小生似乎特別喜歡ViuTV女星，例如張振朗與楊偲泳，是否隔籬飯香？沈震軒聞言笑說：「咁咪好囉，大家合作！」他表示與友台藝人拍拖沒有壓力：「我不嬲好少講感情事嘅，私人生活都係鍾意簡單，但唔會刻意避忌，會照出街，又會同女朋友拖手。」

採訪、攝影︰Pauline

編輯：李潔盈

美術：梁政敏