飲Sammi「縮水湯」 暴脹梁漢文激減6磅

梁漢文前席出席電影活動，身形明顯發福不少的他，坦言疫情下體重暴增十幾磅。由於他十月開演唱會時要以最佳狀態示人，老友鄭秀文（Sammi）即教他用「縮水湯大法」，成功搣甩六磅！

梁漢文前晚與廖碧兒、張兆輝、林曉峰及林雪等，出席由周顯揚執導、老婆杜緻朗監製及編劇的新片《我們永不言棄》溫情招待場，今次亦是戲院重開後首個電影公開活動。周顯揚夫婦表示電影能順利上映十分高興，對於戲院隔行坐影響票房，周顯揚說：「戴口罩、隔位係安全，商業上梗係有影響，但永不言棄。」

廖碧兒學水耕種植

梁漢文開心戲院重開，他與王菀之合演的電影《阿索的故事》相信稍後可上映，令他甚興奮。但他坦言疫情下體重急升：「我暴肥咗十幾磅，依家155磅，係人生最高峰，老婆都肥咗好多，所以要一齊減。」由於十月開個唱，他坦言心急減肥：「我周圍問人點減肥，最後揀咗鄭秀文嘅『縮水湯大法』，飲咗即刻減六磅，拍咗片遲啲同大家分享。」他坦言想瘦多十磅：「真係要call番啲腹肌出嚟！」

同場的廖碧兒否認跟富二代前度盧啟賢復合，又謂最近忙學習水耕種植，她說：「種下香料同蔬菜，自給自足，將來可以教小朋友。」身旁的林曉峰即抵死問廖碧兒：「你有無施肥？我驚用咗你自己嘅咩…嚟做肥料。」廖碧兒即笑指水耕種植不用施肥。

撰文︰倪小珊

編輯︰李潔盈

美術︰梁政敏