D2 Place周末市集重開 慶祝母親節好去處

香港疫情逐漸緩和，防疫措施都放寬咗，今個星期日就係母親節，黛安已經訂咗枱同媽咪食飯。最近收到風，停辦咗超過1個月嘅荔枝角D2 Place周末市集，今個星期六、日終於重開喇，到時帶埋媽咪去行下都好呀。

麥田捕手假日市集終於回歸D2 Place，今次有超過80位本地手作和設計品牌參加，同大家一齊慶祝母親節，展出數百款各類型嘅工藝和設計，包括做皮革製品、手工烘焙食品、針織刺繡布藝等等。黛安就對早安花舍Jo & An嘅小盆栽有興趣，送畀慳家媽咪就最適合，實用之餘仲賞心悅目。

公關姊妹仲話，疫情期間D2 Place做咗好多準備，包括裝修咗1期商場天台花園，2期商場亦會喺6月開設PowerPlay Arena，除咗經典嘅室內飄移賽車，仲有30多款機動和電子遊戲。另外，D2 Place會全面推行Pet-friendly，歡迎大家帶寵物一齊喺戶外輕鬆下，呼吸新鮮空氣。