不少藝人藉着參加藝員訓練班、歌唱比賽或選美等途徑加入娛樂圈，但有否諗過他們做藝人之前做過甚麽職業？《機場特警》的「Hill張」張振朗原來曾是時裝店Sales，更遇見過當家花旦，話唔定你都試過由他招呼㗎！《愛•回家之開心速遞》「大小姐」林淑敏就做過空姐，你又有無坐過她工作的航機呢？
張振朗是無綫藝訓班出身，近年備受力捧，演繹過很多不同角色，而他入行前曾做多種職業，包括外賣員、DHL快遞做文員、售貨員，還在紅館做過喇叭駁綫工作等等，相信這些工作經驗對他揣摩角色都有不少幫助。問他送外賣時有否如電影情節般，當大門打開便見到性感女郎出現？他笑言︰「呢啲係幻想多咗啦，其實次次送外賣，開門嘅都係男人！」他表示當年剛滿16歲，經朋友介紹送外賣，後來他又介紹一位朋友，大家柴娃娃一齊做外賣員，感覺幾好玩。
做了約兩個月送外賣生涯後，張振朗轉做類似傳銷的工作，每日不停打電話游說人買嘢，他說︰「我真係無試過畀人鬧，可能因為我好有禮貌，不過打十個電話十個都拒絕我囉，呢份工真係齋食檸檬，哈哈！」
學懂待人處事
後來他在尖沙咀一間已結業的連鎖牛仔褲專賣店擔任售貨員，才算是正式第一份工作。「做咗大約一年半，做得好開心㗎，嗰時我17歲，喺舖頭年紀最細的，好多同事都好錫我。最深刻體驗係去sale人買嘢，初時我唔識應該點樣做，好彩有啲年資較深嘅同事會教我點樣sale客。之後我做咗藝人，都返過去舖頭探佢哋，嗰一刻我忍唔住喊，因為諗起佢哋對我嘅好，有幾個女Sales甚至好似我阿媽咁，好多時會買包請我食。我最叻係記性好，褲架上每條牛仔褲嘅冧巴，我可以由第一條講到最後一條都無錯，（你依家嘅口才係咪做Sales練番嚟？）咁又唔關事，但係就學識待人處事，同埋識得點樣有拼勁，因為如果一張單有$1,000，當時我可以賺到$10佣，試過一個月加埋人工有$17,000。我仲學識反應快，每次有客人踏入門口，就會好自然同人打招呼！」張振朗還記得，在店中曾遇到李施嬅、麥長青來幫襯，更想不到日後大家會成為同事呢！
林淑敏︰俏空姐最難頂洗廁所
在《愛•回家之開心速遞》飾演「大小姐」的林淑敏（Mandy），參加選美入行前原來曾經做過九個月空姐，她表示雖然日子不算長，但從中獲得不少寶貴經驗，有助演戲。
Mandy的空姐生涯中，遇到的客人大多數都是很熱情的，她笑言︰「可能我嘅年資比較短，所以無遇過令自己受挫敗感嘅客人。當時我多數飛短綫如台灣，長綫都試過飛歐洲。其實我投考空姐都係諗住可以飛來飛去，好似去旅行咁開心。」但她坦言短短四日來回歐洲的經歷，相當辛苦。「最豪氣及最熱情的是台灣遊客，每次落機佢哋都當我哋好似朋友，好熱情同我哋道別，所以印象好深刻。」
由於Mandy曾任職空姐，所以現在坐飛機做乘客時亦有一番體會，她表示會對空中服務員比較包容及體諒。問她做空姐時覺得最難頂的工作崗位是甚麼？她笑言︰「好多崗位都做過，最難頂應該係洗廁所。另外，有時瞓覺嘅地方會比較狹窄，都有啲唔舒服嘅，不過時間耐咗、適應咗都OK。」
蔡思貝︰外賣速遞賺一蚊幾毫
蔡思貝返港參選港姐前，是在新西蘭升學，她透露在當地讀書期間，雖然沒有搵兼職，但就想出一條可以賺外快的妙計，她說︰「其實係做外賣速遞員，我都算係一個老闆嚟㗎。因為當時學生宿舍同市中心有一段距離，同學都唔想每日長途跋涉去市中心買嘢，於是我諗咗個辦法，就係我踩單車去市中心順道幫同學買日用品同埋食物，每次收一蚊新西蘭元，有時落雨的話就收多五毫子，其實對我嚟講係一舉兩得，雖然賺錢唔多，但我可以每日就當做運動，可以賺少少零用錢之餘，同學都開心㗎，我每個月大約賺到20幾蚊新西蘭元，都好開心㗎！」
李施嬅︰旅行社暑期工恨買平機票
李施嬅自小跟隨家人移民加拿大多倫多，她03年返港參選港姐前，曾在加拿大一間旅行社做暑期工，她直言因為嚮往飛來飛去，所以選擇到旅行社工作，更一心想着可以隨時購得平價機票去旅行，又能夠「儲積分換機票」，她說︰「其實都training咗三個月，好認真㗎，要背熟晒各個國家嘅code，仲有啲飛行資訊，好多航空規例都要背熟。嗰時每年會返香港探親兩星期，記得training期間同上司講我要暫時放假兩個禮拜，當時佢話OK，點知原來一直都唔記得入紙幫我申請假期，因此公司同我失去聯絡，結果我就被炒了！」
施嬅表示，慶幸受訓的三個月仍獲發薪金，但最可惜是一直渴望的「儲積分換機票」計劃就泡湯。之後她繼續返校園讀書一年，然後返香港參加選美。
吳業坤︰做Cashier唔再攞零用錢
吳業坤參加《超級巨聲2》入行前，曾任職保險Cashier做暑期工，他表示當年（09年）豬流感爆發，剛巧有朋友從疫情流行的美國返港，坤哥跟那位朋友見面後不久，對方證實患上豬流感，幸好坤哥並未被感染。不過，朋友的媽媽大感歉意，更介紹坤哥在一間保險公司擔任Cashier，坤哥表示︰「其實我只係做入單工作，公司唔會咁快畀我管錢嘅，不過呢份工最後都做咗一、兩年，之後考完A-Level我就入讀大專，然後參加《超級巨星》入行，才沒有再做呢份工。」
坤哥表示做暑期工最重要是賺外快，他表示︰「因為要返學呀嘛，咁自己賺到少少錢，起碼唔使問屋企人拎零用錢，好有滿足感㗎！」
他又表示有很多工作都想嘗試，又透露其實已經申請working holiday，「我申請咗日本Working Holiday，已經批咗，不過撞啱（新冠肺炎）疫情，我暫時無辦法飛。其實簽證批咗一年，我唔係諗住喺嗰邊做足一年，只係間中飛過去做兩、三個禮拜見識下，始終我都放棄唔到呢度（香港娛樂圈），不過依家邊度都去唔到，一切都要等疫情過咗，先計劃幾時飛。」
採訪︰Pauline
插圖︰Simon
編輯︰黃寶恩
美術︰顏玉玲