吳家麗拍親熱戲一殼眼淚

ViuTV開拍全新劇集《熟女強人》，賣點除了是胡杏兒產後復出，還有久違了的吳家麗演出。吳家麗早前接受節目《金像女情》主持何嘉麗訪問，提到入行多年演過不同角色，亦曾因擅演小三角色差點被定型。她笑言：「我係好吃得苦嘅潮州妹！」從電視轉到大銀幕，拍攝電影《龍虎風雲》備受注目，她表示壓力很大：「當年發仔（周潤發）都因為演呢部戲由票房毒藥變為票房天王！我雖然演唔正經嘅角色，但都係女主角。當年鄭裕玲係鄭九組、吳君如係吳九組，我都係吳九組！」

吳家麗與周潤發、梁朝偉、梁家輝及任達華等男星合作過，當中更演過不少親熱戲，但她直言拍親熱戲一點也不好受：「觀眾享受男女主角浪漫激情，演員就一殼眼淚！」她指有次在美國拍戲，因外籍對手的鬚根好長，拍三分鐘咀戲，結果臉龐被磨到又紅又腫。