森美想邀上節目 細So被裁︰慶幸我無變過

DJ細So（蘇耀宗）日前突遭商台即日「炒魷」，連向聽眾道別亦無機會。細So前晚在IG開live，表示有舊同學指他「成世人都係咁」︰「我覺得幾開心，以前我會同老師據理力爭，慶幸睇番過去咁多年，我個人無變過。」舊同事森美亦po出舊照，鼓勵他「明天會更好」。森美昨日在電視城錄影，坦言不捨細So離開︰「細So好有音樂才華，工作上我唔擔心佢，而且大家合作咗咁多年，將來都可以再邀請佢返嚟做嘉賓。」

另外，森美表示大仔前晚已完成家居隔離「出關」︰「阿仔自己剪咗手帶，呢14日佢完全無出過房門，好叻仔。」他指父母、兒子先後完成隔離，他錄影後便趕回家吃飯，正式一家團聚。

採訪︰Pauline

攝影︰林良明