何雁詩驚染疫以淚洗面

何雁詩上周突然發燒及喉嚨痛，擔心感染新冠肺炎，便立即睇醫生做快速測試，並停工在家自我隔離，幸好檢查結果為陰性。經過一星期「閉關」，她昨日復工到商台受訪，全程戴口罩的她坦言不敢隨便除下口罩。談到14日潛伏期仍未過，她說︰「醫生話如果身邊無人正在隔離，我無外遊，亦無接觸過確診人士，所以唔使隔離14日。」

何雁詩坦言等待測試報告時，心情非常差，擔心得以淚洗面。她說︰「擔心有機會感染一齊工作嘅人，令佢哋感染屋企嘅老人家同小朋友。」她透露隔離期間，未婚夫鄭俊弘（Fred）一直做廳長︰「有晚我喺房，同Fred講我要瞓，佢喺房出面同我揮手打氣，嗰一刻我忍唔住喊咗出嚟。」她笑言得知自己無事後，開心得飛撲攬實Fred。

經過今次染疫疑雲，何雁詩自言已加強防疫措施，盡量留在家中，不外出食飯，也不相約家人朋友。她說︰「諗到原來可以影響好多人，唔想加重醫護人員嘅負擔，喺醫院見到前綫醫護人員full gear，比自己更辛苦。」

採訪︰Pauline