監製爆《降魔的2.0》鐵定5月播 馬明︰小馬終於搵到豪仔！

日前傳出「視帝」馬國明（馬明）主演的《降魔的2.0》將於五月開播，該劇監製方駿釗昨午向本報透露，新劇將緊接《機場特警》的8:30pm時段推出。而演活「麻甩的士佬」的馬國明，昨午亦回應稱︰「我都希望快啲推出，小馬終於搵到豪仔，今輯會圍繞我同豪仔條綫發展！」

17年尾播出的《降魔的》曾獲觀眾捧為神劇，同時馬明、胡鴻鈞（石敢當/豪仔）的配搭產生化學作用，兩人憑劇集人氣爆升。馬明當年力爭視帝卻大熱倒灶，掀起了各界熱議。無綫於去年初開拍續集《降魔的2.0》，除了原班人馬上陣，更加入C君（鄭詩君）、譚凱琪等新面孔。

近日有指該劇下月將緊接《機場特警》播出，監製方駿釗親認此事，他表示︰「據我所知係5月嘅8點半檔出街，但確實日期未有通知！（疫情有助推高收視？）我都覺得有實際幫助，不過如果齣劇唔好睇，觀眾都會選擇唔睇！」提到胡鴻鈞飾演的「精靈」石敢當已經灰飛湮滅，今次他以何種方式登場？監製續稱︰「承接上輯故事，豪仔上次死咗，今次胡鴻鈞以鬼魂返嚟上豪仔身，不懷好意接近小馬，更會以不同形態在小馬面前出現！」

馬明盼續集再吸正評

本報昨日聯絡馬明，他坦言期待劇集開播︰「暫未收到宣傳及正式通知，不過都聽講話5月出，套劇我好鍾意，希望快啲出街！」提到小馬再度登場，馬明踢爆劇情指︰「第一輯小馬搵唔到豪仔，只見到石敢當；第二輯終於搵到豪仔，主要圍繞我同豪仔條綫發展！（市民留在家中有助收視升？）收視對我唔重要，以前星期三跑夜馬收視低，打8號風球又收視高，我重視口碑多啲，寧願觀眾鍾意劇本、演員表現，劇集質素緊要過收視點數，如果疫情影響人唔出街先至收視高，對我係無乜意思。最希望觀眾評價好，多啲人讚好睇先重要！」不少網友期待小馬回歸；有觀眾亦睇好馬明繼《白色強人》後再憑新劇冧莊視帝。

撰文︰Steven

編輯︰陳禮恒

美術︰Simon