入紙娶圈外女友 無通知朱慧敏 彭懷安搵「媒人」啤梨做兄弟

前組合EO2成員彭懷安（Eddie）昨日被揭已經入紙註冊結婚，將迎娶葉文輝（啤梨）太太的好姊妹Ivy（鄭佩儀），二人於前年在啤梨的婚禮上邂逅，拍拖一年左右便極速閃婚。Eddie昨日接受本報訪問時，踢爆啤梨狂追「媒人」利是，更稱︰「我到時會請佢做兄弟。」粉絲稱讚Eddie與Ivy十分登對；有網友亦感慨這是對的時間遇到對的人！

41歲的Eddie過往與舊愛朱慧敏的七年情，曾經轟動娛樂圈。二人原來15年宣布結婚，卻因男方被爆出軌，令婚事告吹。雖然他倆在17年曾被爆低調復合，可惜最終也未能開花結果。

事隔三年，昨日有傳媒揭發男方早有新歡，更已在本月11日入紙註冊結婚。據知Eddie的41歲未婚妻Ivy是圈外人，從事保險業，兩人是前年七月在好友啤梨的婚宴上相識，其後低調撻着墮入愛河。他早前指，擺酒日期未定，而自己亦恨做爸爸。

昨晚Eddie回覆本報時，指婚事希望盡量低調，亦感謝「媒人」啤梨。Eddie笑言︰「我02年出道就識佢，大家同期，所以無辦法唔請佢做兄弟，嚟唔嚟到一件事！佢追『媒人』利是追咗好耐。」

孖未婚妻行山談情

提到與未婚妻經常拍拖行山，Eddie回應︰「女友鍾意運動，但未必想太劇烈，所以行山適合佢！」問到舊愛朱慧敏可知道其婚訊，他透露沒有與對方聯絡。不少粉絲向這對準新人送上祝福；有人亦勸Eddie婚後要修心養性。

昨午本報聯絡到「媒人」啤梨，他大讚Eddie和Ivy皆屬玩得之人，因此好夾。啤梨稱︰「Ivy係我結婚時姊妹團之一，Eddie就幫我做兄弟，知道佢哋結婚都戥佢哋開心！」他又稱初時只是一班人玩，並不知道二人的戀情。提到可會出席好兄弟婚禮，他笑言︰「如果唔請我，我會嬲！（要收番封媒人利是？）梗係！」啤梨又直言老友行山無預自己︰「可能驚我做電燈膽啩！」

撰文︰Pat、Steven

編輯︰黃寶恩

美術︰Simon