疫情影響少工開 黃澤鋒全家「食穀種」過活

黃澤鋒昨日為香港開電視節目《我的志願速成班》任主持，他坦言在新冠疫情影響下收入大減，一家三口「食穀種」靠積蓄過活；而八個月大的囡囡日前發燒，惹來肺炎疑雲，令黃澤鋒嚇餐飽。

黃澤鋒透露，囡囡小黃妃日前發燒至38度，嚇得他以為女兒「中招」，幸好服藥後已退燒：「嗰兩日好驚，因為發燒係新冠肺炎其中一個病徵。阿女食咗藥後退燒，但身上出咗一粒粒玫瑰疹，原來係出牙仔。」看着寶貝女發燒消瘦，黃澤鋒心痛說︰「仲諗我的志願？個女健康無事已經飲得杯落。」疫情影響下，他現時不敢帶女兒外出，亦減少乘坐公共交通工具，但多了親子時間︰「阿女好黐身，抱住佢入睡好開心。」

林子博太太腫瘤縮小

另外，黃澤鋒坦言游水班及泰拳工作全面停止，一家三口靠積蓄過活：「好彩都有啲穀種食。太太全職湊女，全家一擘大眼就有支出，好彩開電視搵我開工，唔係我就快悶到發癲。」

同場的林子博一家四口擔任節目嘉賓，努力抗癌的林太Shirley，透露最近覆診時，發現腫瘤縮細了1.5厘米，令全家十分振奮。Shirley表示聽從醫生指示，保持正常生活兼給自己正能量。Shirley兒子昨日在節目中親自下廚，煮營養雞胸肉給媽媽品嘗，令Shirley十分感動。

撰文︰倪小珊

攝影︰林良明

編輯︰李潔盈

美術︰梁政敏